Gee jou Lewe oor
aan God

Vader, dankie dat ons as gevolg van Christus en ons geloof in Hom, nou met vrymoedigheid toegang het tot U. (Efesiërs 3:12)

Dankie, Jesus, dat U ons gered het, nie op grond van die werke van geregtigheid wat ons gedoen het nie, maar as gevolg van U barmhartigheid.  U het ons gered deur die bad van die wedergeboorte en die vernuwing deur die Heilige Gees wat U ryklik op ons uitgestort het. (Titus 3:5-6)

Here, ons vrees U, kies om in al U weë te wandel en U lief te hê en die Here ons God te dien met ons hele hart en met ons hele siel; om U gebooie te hou dat dit met ons goed kan gaan. (Deuteronomium 10:12-13)

Skep vir my 'n rein hart en gee opnuut in my 'n vaste gees, Here. (Psalms 51:12)

Here, ons verwyder die onreg uit ons tente en keer terug tot U, die Almagtige, sodat ons gebou sal word in ons lewens en nasie. (Job 22:23)

Jesus, ons oë is gevestig op U, die Leidsman en Voleinder van die geloof, wat vir die vreugde wat U voorgehou is, die Kruis verdra het, die skande verag het en aan die regterkant van die troon van God gaan sit het. (Hebreërs 12:2)

Here, ons reken alles as skade in vergelyking met die uitnemendheid van die kennis van U, ons Here, ter wille van wie ons alles prysgegee het en as verwerplik beskou, sodat ons U as wins verkry. (Filippense 3:8)

Jesus, ons bid dat Suid-Afrika in U sal bly sodat U in ons land sal bly. Net soos die loot geen vrug kan dra van homself as dit nie in die wynstok bly nie, sal ons ook nie, as ons nie in U bly nie. (Johannes 15:4)

Volgens U woord dra 'n goeie boom nie slegte vrugte nie, en 'n slegte boom ook nie goeie vrugte nie.  Want elke boom word geken aan sy eie vrugte. Ons bid dat ons nasie bekend sal wees vir goeie vrugte. (Lukas 6:43-44)

Here, mag ons saai volgens die eis van geregtigheid, maai in ooreenstemming met die liefde; want dit is tyd om U te soek, totdat U kom en geregtigheid oor Suid-Afrika laat reën. (Hosea 10:12)

Vader, ons sal nie U onderwysing vergeet nie, en U gebooie in ons harte bewaar; want dit sal lengte van dae en jare van lewe en vrede vir ons vermeerder. (Spreuke 3:1-2)

Terwyl ons dan hierdie beloftes vir ons nasie het, laat ons ons van alle besoedeling van die vlees en die gees reinig, en laat ons die heiligmaking in die vrees van God volbring, Here. (2 Korintiërs 7:1)

Here, help ons om heilig te wees, net soos U wat ons geroep het, dat ons ook in ons hele lewenswandel heilig sal word; omdat daar geskrywe is: Wees heilig, want Ek is heilig. (1 Petrus 1:15-16)

Mag ons almal, met onbedekte gesig soos in 'n spieël, die heerlikheid van die Here aanskou, en van gedaante verander na dieselfde beeld, van heerlikheid tot heerlikheid, deur U Heilige Gees. (2 Korintiërs 3:18)

Mag ons nasie gevul word met die kennis van die heerlikheid van die Here soos die waters die seebodem oordek. (Habakuk 2:14)

Here, U het ons bekend gemaak met wat goed is. Help Suid-Afrika om reg te doen en liefde te betrag en ootmoedig te wandel met U. (Miga 6:8)

Deurgrond ons, o God, en ken ons harte; toets ons en ken ons gedagtes; en kyk of daar by ons 'n weg van smart is en lei ons op die ewige weg! (Psalms 139:23-24)

Dankie, Vader, dat wanneer ons tot U nader, U tot ons sal nader. Ons reinig ons hande, as sondaars, en suiwer ons harte van dubbelhartigheid. (Jakobus 4:8)

Vader, heilig Suid-Afrika in U waarheid; U Woord is die waarheid. (Johannes 17:17)

Jesus, ons sal ons kruis opneem en agter U volg, want wie sy lewe vind, sal dit verloor; en wie sy lewe verloor om U ontwil, sal dit vind. (Matteus 10:38-39)